الحلقة الرابعة: حركات ستات ومهيسة رجاله (رحلة للحب والسعادة والحنان )

حركات ستات ومهيسة رجاله

الحلقة الرابعة
رحلة للحب والسعادة والحنان


أنا شخصيا بحب فى المرأة فراستها وفهمها للراجل من نظرة واحدة وده لو هى عايزه فعلا إنها تفهمه ..ففهم المرأة للرجل من نظرة واحدة حيوفر عليه حاجات كتير هو فى غنى عنها وحيريحه كتير أوي .. وبعض الرجالة موش بتحب الحكاية دي لأنهم حابين يكونوا غير مفهومين لزوجاتهم وفى نفس الوقت يريدون زوجاتهم كتاب مفتوح قدامهم .. والنوعية دى من الرجالة تقولك "اصل مينفعش يا عم الحج أكون كتاب مفتوح لها ساعات بحب أهيس أو أقولها انا فى الشغل وانا موش فى الشغل وكده يعنى فمينفعش تفهمني من نظرة عين دي " ..إذن الرجل بيخاف من المرأة اللى بتسبر أغواره وده فى حالة الرجل اللى موش مظبوط .. بمجرد ما تبص له المرأة يبدأ فى بلع ريقه والتهته فى محاولة لتبرير موقف ما مراته كشفته فيه ..وبصراحة الست موش بتفوت حاجه .. يعنى هى لو مقتنعتش من قرارة نفسها بالكلام اللى بيقوله الراجل حتعلقه فى فلكة السين والجيم ..

وخد عندك على سبيل المثال أحد الرجالة قد حكي لي ان مراته ظبطت فى جيبه علبة مقويات وطبعا بأنف المرأة حست ان زوجها بيخونها وبعد المواجهة بينها وبين زوجها ومواجهتة بأداة الجريمة أعترف وأقر ان العلبة دي بتاعته ولكن برر لها انه جايبها علشان علاقتهم الحميمه هو وهي تكون احسن ، لكن الست دى لم تقتنع بكلام جوزها رغم انه كلامه يبدو منطقيا جدا .. وبعد أن تقمصت زوجته دور ( شرلوك هولمز ) قدرت انها تظبطة فى مقابلة مع غريمتها فى إحدى الاماكن العامة ..فالمرأة لازم تقتنع على الاقل علشان تشبع فضولها وخصوصا إن المدركات الحسية عند المرأة أحسن من الراجل .. تخيل كده لو أنت قاعد إنت وزوجتك أو خطيبتك فى مكان عام وبعد أن تقوموا من المكان ده حتلاقى المرأة حافظة كل شىء لمحتة بعنيها فى المكان .. فحتلاقيها عارفه تفاصيل دقيقة جايز تكون إنت ملمحتهاش أو حتى لم تهتم بيها .. فمثلا لو حصل صوت مزعج او اى شىء لابد ان تلتفت المرأة فى حين ان الراجل ممكن يكبر دماغه وينفض ..خد عندك كمان المرأة بتلاحظ الراجل لابس ايه وبتتفحصه من اخمص قدمية إلى منبت شعره بعكس الراجل اللى ممكن موش يلاحظ الست لابسه ايه ويهتم بها هى شخصيا وده لا يمنع ان فيه من الرجاله اللى بتهتم بلبس المرأة لكن بتكلم عن فكرة الملاحظة الدقيقة اللى بتتمتع بيها المرأة دون الرجل ..

وعلى فكرة ده شىء رباني يعنى المرأة هى عمود وأساس البيت لابد ان تلاحظ كل شىء فيه وبلاشك جوزها من مكونات البيت ده اللى بتسلط عليه المرأة تركيزها وإهتمامها وعلشان كده تلاقى بعض الرجالة عايز يشغل مراته موش عايزها تقعد فى البيت ..طب ليه يا عم الحج ؟! يقولك "اصلها لو قعدت فى البيت حتفضالى انا بأه وتمسكلى الساعة يا عم سبها تتلهي فى أى حاجه " وأنا شخصيا ضد الفكرة دي وضد فكرة عمل المرأة من الاساس لكن دى فى النهاية تبقى وجهة نظر خاصة بي لا أفرضها على أحد ..فكون المراة تهتم بجوزها ده شىء جميل جدا وكون الراجل يحس انه مِدَلّع ده قمة النشوة واحساسه برجولته .. والراجل بطبيعة الحال مع المرأة بيتعامل معاها كأنه طفل فأحيانا يزعل بسبب أو حتى بغير سبب بيكون فقط عايز يسمع كلمة حلوة من مراته تداديه وتناغشه ..

فالرجل فعلا طفل مع المرأة يحس معاها أنها هى أمه وهى اخته وهى كل شىء له وهذا هو سر الحياة الزوجية وسر العلة القرأنية من خلق إناثا من أنفسنا ازواجا وهي "لتسكنوا إليها" فالمرأة هى السكن وبالتالى أقدر أقول دون مبالغة إن المرأة ودون أن تدري هى صاحبة التاثير الأقوى فى العلاقة الزوجية ..فالمرأة تستطيع ان تؤثر فى الرجل بسهولة وتغير فيه اللى هى عايزاه ولكن فقط لما يحبها .. هناك مقولة بتقول ( أنت تقود المرأة فى كل شىء إلا فى السعادة والحب والحنان فهي تقودك إليه ) .. انت مصدق الحكمة دى ولا منفض لها ؟! ..انا مصدقها لان الواقع يثبت صدقها لكن الاهم كمان ان المرأة نفسها تصدقها لان هى اللى بيدها التغيير وهى اللى بيدها دفة الامور وعلشان كده انا بقول ديما ان الست هى لازم اللى تبادر وتصالح الراجل لما يكون زعلان منها حتى ولو كان هو اللى غلطان وده موش تحيز إطلاقا للرجال ولكن لان المراة هى اللى بيدها احتواء الرجل لكن الحاصل ان العنجهية والاحساس بالنفس المبالغ فيه قد يدفع المرأة انها تضيع فرصة عظيمة ممكن بها انها تحتوي الرجل ..فتلاقيها تقول وليه يعنى لازم انا اللى أصالحة وليه هو موش اللى يبدأ ؟! ..

وتبدأ انها تحط ليه ولماذا وعلشان ايه بينها وبين الراجل لغاية ما الفجوة تزيد .. مع انها لو حطت فى دماغها ان الراجل ده بدأ الخطوة الاولى ودفع فيها الغالى والنفيس علشان يحصل عليها ويستتها فى بيتها لأستشعرت ان الرجل قد قدم الكثير ويبقى عليها احتواءه .. وللأسف فى العصر الحالى كتير من البنات واللى هم خريجات جامعة وفيهم اللى معاها دكتوراه ولكنها أمية فى معاملتها لزوجها فى حين ان الستات بتوع زمان اللى كان معاهم الابتدائية واللى موش معاهم حاجه اصلا قدروا انهم يحتفظوا بأزواجهم ويحتووهم بعيدا عن قول القائل زمان كانت الست مستبعدة وهذا الكلام اللى بس عماله ترددة الستات بتوع حقوق المرأة واللى لو بصيت لاى واحدة منهم حتلاقي ان ولا واحدة فيهم قدرت انها تحتفظ بزوج ، فحتلاقى منهم اللى مطلقة واللى مهمله زوجها فموش دول اللى البنات تاخد منهم الثقافة الزوجية فزمان كانت فيه واحدة ولسه بتكتب حاليا كانت بتهاجم الطلاق وانه نظام ظالم ..

رغم ان الطلاق ده ممكن يكون حل اخير للمرأة .. ولكن هذه الست التعبانة فكريا هاجمت الطلاق بشكل عام وفى الاخر الست اللى بتهاجم الطلاق دى إطلقت واتزوجت 3 مرات وطبعا كلنا عارفينها هى اللى نفوخها ضرب بدري بدري الولية ( نوال السعداوي) ..فنسبنا باه من الناس الفشلة دى فى حياتها واللى بتمارس عقدها على خلق الله وبلاش يا بت الحلال تحطي حساسية بينك وبين جوزك او خطيبك وتقربي إليه حتى لو هو الغلطان وواحدة وواحدة مع كلمتين حلوين حتلاقيه هو بنفسه يعتذر لك لو كان غلطان ويراضيكي .. أصل الفكرة يا جماعة ان الراجل موش عدو الست زى ما العالم التعبانة دي بتحاول تبين .. ده الراجل سندها فى الدنيا دي وهى عرضه وشرفه فهم موش حاجتين دول حاجه واحدة .. فالواحد نفسه يعنى ان المرأة تبطل حركاتها اللى ممكن تخسرها الراجل وكمان الراجل يبطل مهيسته اللى بتزعل منه الست ويضلل عليها بجناحه فهي جنته وناه لو أراد أو عكننته وشفاه لو أرد برضه .

وإلى اللقاء قريبااااااااا
مع الحلقة الخامسة
غلاف هذه السلسلة مع [url=http://forums.mazika2day.com/t47883.html]المقدمة من هنااااا
الحلقة الأول من هناااااااااااااااااااا[/url]
الحلقة الثانية من هناااااااا
الحلقة الثالثة من هنااااا

بقلمي
أكرم صبري